Бүген, җөмәдәл-ахыр аеның 9 нчы көнендә (29 ноябрь) Казан шәһәренең Мәрҗани мәчетендә тантаналы рәвештә Оман дәүләтенең бай рухи һәм мәдәни мирасына багышланган “Гомумкешелек кыйммәтләре хакына: Оманда үзара аңлашу, татулык һәм тынычлык традицияләре” Халыкара күргәзмәсе ачылды. Анда Татарстан Мөфтие Камил хәзрәт Сәмигуллин, Оман дәүләтенең Дин эшләре һәм вакыфлар министры доктор Мөхәммәд бин Сәид Әл-Мамари, Татарстан Рәисе ярдәмчесе, “Россия – ислам дөньясы” стратегик караш төркеме рәисе урынбасары Марат Гатин, РФ мөселманнары Диния нәзарәте рәисе урынбасары, Мөфти Рушан хәзрәт Аббясов, дустанә илләрнең Казандагы консуллары, җәмәгать һәм мәдәният эшлеклеләре, журналистлар катнашты.
Әлеге чараны Россия Федерациясе мөселманнары Диния нәзарәте һәм Оман дәүләтенең дин эшләре һәм вакыфлар министрлыгы оештырды. Казанда күргәзмәне уздыруда Татарстан Республикасы мөселманнары Диния нәзарәте ярдәм күрсәтә.
Күргәзмә Изге Коръән аятьләре укылып ачылды.
Татарстан Мөфтие Камил хәзрәт Самигуллин, күргәзмәгә килүчеләрне һәм кунакларны сәламләп, министрның Оман мәдәнияте, бу илнең Коръән өйрәнү өлкәсендәге традицияләре, нәһү фәненә нигез салган Оман галимнәренең исемнәре белән таныштыруы хакында сөйләп үтте. “Болар барысы да игътибарыбызны җәлеп итә һәм бу ил белән якыннанрак танышырга чакыра. Монда җыелган барлык кунаклар – үзенең кабатланмас йөзе һәм мәдәнияте булган Чечен Республикасыннан, Казахстаннан, Ираннан. Аларның халыклары глобальләшүгә дучар булмады, үз традицияләрен саклап калды. Аллаһы Тәгалә Коръәндә безне кабиләләр һәм халыклар итеп яралтуын әйтә. Ни өчен шулай? Бу без юкка чыксын өчен түгел, ә бер-беребезне танып белү өчен кирәк. Бу күргәзмәдә без Оманны якыннанрак беләчәкбез һәм анда барырга һәм аны өйрәнергә теләк туачак. Оманлыларның үз мәдәниятләре һәм традицияләрен саклавы яхшы, башкача булса, анда барудан мәгънә булмас иде”, – дип белдерде хәзрәт. Камил хәзрәт әлеге күргәзмәне оештыруда катнашучыларга, аерым алганда, Рушан хәзрәт Аббясовка рәхмәт белдерде һәм җәмәгатьчелекне кызыклы экспозицияне карарга чакырды.
Оман дәүләтенең Дин эшләре һәм вакыфлар министры доктор Мөхәммәд бин Сәид Әл-Мамари Татарстан Рәисе Рөстәм Миңнехановка кунакчыллыгы һәм Россия белән ислам дөньясы арасындагы мәйданчыкта гомумкешелек кыйммәтләрен ныгытуга игътибары өчен рәхмәт белдерде. Ул шулай ук Мөфти Камил хәзрәт Сәмигуллинга, РФ мөселманнары Диния нәзарәтенә һәм әлеге чараны оештыручыларга күргәзмәне уздыру өчен бик яхшы шартлар тудырган өчен рәхмәт белдерде. Аның фикеренчә, бу халыкара күргәзмә гуманитар проект булып тора: ул бер-береңә карата хөрмәт хисләрен көчәйтүгә һәм халыкларның тату яшәү тәҗрибәсе белән уртаклашуга юнәлтелгән.
Марат Илшат улы Гатин кунакларны "Россия – Ислам дөньясы" стратегик караш төркеме исеменнән сәламләде һәм Оман белән Россия, шул исәптән Татарстан арасында дипломатик элемтәләрне ныгытуның мөһимлеген билгеләп үтте, барлык килешүләрнең дә тиз арада гамәлгә ашырыла башлаячагына ышаныч белдерде. "Бу күргәзмә дә, Камил хәзрәт әйткәнчә, бер-беребезне яхшырак белер өчен, багланышлар үсешенә үз өлешен кертә», – диде Марат Илшат улы һәм барысын да күргәзмәгә килергә чакырды. Ахырда ул Россия һәм Татарстанның оманлылар өчен ачык булуын билгеләп үтте һәм аларның безнең илгә сәфәренең нәтиҗәләре булачагына ышануын әйтте.
Рушан хәзрәт Аббясов, ачылыш тантанасында чыгыш ясап, Россиянең төп Мөфтие Равил хәзрәт Гайнетдинның сәламләү сүзләрен җиткерде һәм Камил хәзрәт Сәмигуллинга – теләктәшлеге өчен, ә кунакларга һәм ММЧ вәкилләренә – уникаль күргәзмәгә карата зур кызыксынулары өчен рәхмәт белдерде.
Әлеге чара Казанның мәдәни тормышында истәлекле вакыйга булачак һәм әлеге гаҗәеп илнең тарихы, мәдәнияте һәм гореф-гадәтләре белән танышырга мөмкинлек бирәчәк.
Күргәзмәне карарга килүчеләр Оман дәүләте үсешенең тарихи этаплары, аның дөнья мәдәниятенә керткән өлеше, дини тормыш үзенчәлекләре һәм архитектура традицияләре хакында белә алачак. Аерым игътибар әлеге илнең динара элемтәләрне үстерүгә һәм халыклар арасында үзара аңлашуны ныгытуга юнәлтелгән башлангычларына биреләчәк.
Күргәзмәне “Мәрҗани” мәчетендә 2025 елның 29-30 ноябрендә карарга мөмкин.
