Бүген, зөлхиҗҗә аеның 28нче көнендә (24нче июньдә), Нәзарәттә Татарстан Мөфтие Камил хәзрәт Сәмигуллин ТР Сәламәтлек саклау министрлыгы Республика наркология диспансеры баш табибы Ренат Үткелбаев белән очрашты. Очрашуда шулай ук Татарстан Мөфтиенең беренче урынбасары Илфар хәзрәт Хәсәнов, Республика наркология диспансерының медицина буенча баш табиб урынбасары, ТР Сәламәтлек саклау министрлыгының штаттан тыш баш белгече психиатр-нарколог Резеда Хаева һәм Республика наркология диспансерының оештыру-методик эш буенча баш табиб урынбасары Чулпан Бәдретдинова катнашты.
Хәзрәтләр һәм эчкечелек (алкоголизм)-наркоманияне кисәтү-дәвалау буенча экспертлар, имамнарның рухи остазлар сыйфатында мөһим урын алуын исәпкә алып, мөселман оешмалары белән хезмәттәшлек итүнең мөмкин юнәлешләре хакында фикер алышты. Мөгаллимнәрнең, хәзрәтләрнең һәм мәчетләргә йөрүчеләрнең шәхси уңай мисаллары эчкечелекне кисәтүдә һәм пациентларны дәвалауда, исерткеч эчемлекләргә бәйлелекне башлангыч чорда булдырмый калуда ярдәм итә ала.
Мөфти Камил хәзрәт Нәзарәтнең Татарстан төзәтү учреждениеләре белән уңышлы хезмәттәшлек алып баруын мисал итеп китерде: тоткыннар белән тәрбия эше алып барыла. Ул мәчетләрдә укылган вәгазьләрдә эчкечелек һәм наркомания проблемасына игътибар юнәлтергә тәкъдим итте.
Камил хәзрәт шулай ук медицина белгечләре һәм дин әһелләре (хәзрәтләр) белән Нәзарәтнең мөстәкыйль мәгълүмат ресурсларында теле- һәм радиотапшырулар оештырырга, аерым алганда “Хозур ТВ” федераль мөселман телеканалында, “Ислам тудей” ислам порталында, “Умма”, “Дин вә мәгыйшәт” газеталарында яктыртырга тәкъдим итте.
Җитәкчеләр шулай ук эчкечелек һәм наркоманияне кисәтү буенча уртак басма мәгълүмати материаллар әзерләү һәм аларны мәчетләрдә һәм дәвалау учреждениеләрендә тарату турында килеште.
Хезмәттәшлек кысаларында шулай ук Татарстан Республикасы Сәламәтлек саклау министрлыгы дәрәҗәсендә хезмәттәшлек турында килешү әзерләү һәм имзалау көтелә.
