Бүген, сафәр аеның 24нче көнендә (1нче октябрьдә), Татарстан мөфтие Камил хәзрәт Сәмигуллин Үзбәкстанның Казандагы генераль консулы Фәриддин Насриев белән очрашты. Камил хәзрәт эшлекле очрашуны күптән түгел вафат булган Үзбәкстан Республикасының күренекле дин эшлеклесе, мөфти Усмонхон Алимов хакында истәлекләр белән бүлешүдән башлады, аның арабыздан китүен зур югалту дип бәяләде. Консул үз чиратында эшлекле багланышларны дәвам иттерү буенча тәкъдимнәрен җиткерде һәм Камил хәзрәтне Үзбәкстан мөфтиен сайлау чараларында шәрәфле кунак буларак катнашу мөмкинлеген каравын сорады. Очрашу истәлеге итеп ул мөфтигә Үзбәкстан халыкара ислам академиясе нәшер иткән истәлекле басманы бүләк итте. Әлеге басма тәрбия, әхлак мәсьәләләренә багышланган.
