Бүген, җөмәдәл-ахыр аеның 13нче көнендә (3нче декабрьдә), Нәзарәттә Татарстан Мөфтие Камил хәзрәт Сәмигуллин ТР Дәүләт Советы рәисе урынбасары, Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов белән очрашты.
Мөхтәрәм кунаклар арасында шулай ук ТР Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Зарипов һәм Экология, табигатьтән файдалану, агросәнәгать һәм азык-төлек сәясәте комитеты рәисе урынбасары Нәҗип Хаҗипов та бар иде.
Марат Әхмәтов Мөфти Камил хәзрәткә татар-мөселман традицияләрен саклауда һәм ныгытуда актив ярдәм иткәне өчен рәхмәтен белдерде. Мисал итеп ул мәчетләрдә халыкка рухи-әхлакый тәрбия бирүне үстерүгә юнәлдерелгән чараларның уңышлы оештырылуын билгеләп үтте.
Бүгенге очрашу барышында кунаклар узып баручы елга йомгак ясады һәм 2026нчы елга татар телен саклау өлкәсендә хезмәттәшлек итү буенча планнар билгеләде. Җитәкчеләр бу өлкәдә эшне актив оештыру мәсьәләләре хакында фикер алышты.
