2025нче елның 3нче декабрендә ТР Сәүдә-сәнәгать палатасында Татарстан предприятиеләрендә “Хәләл” туклану системасын кертүгә багышланган түгәрәк өстәл узачак.
Татарстан Республикасы Сәүдә-сәнәгать палатасы һәм Татарстан Республикасы мөселманнары Диния нәзарәте массакүләм мәгълүмат чаралары вәкилләрен «Татарстан предприятиеләрендә хезмәткәрләр өчен туклануны оештыруда хәләл стандартларын кертүнең төп аспектлары” темасына түгәрәк өстәл утырышын яктыртырга чакыра. Әлеге чара хакимият, эшкуарлык һәм дин белгечләре арасында тормыш сыйфаты, хезмәт җитештерүчәнлеге һәм эшмәкәрләр өчен яңа мөмкинлекләр хакында диалог өчен төп мәйданчык булачак.
Ни өчен бу бизнес өчен мөһим?
Татарстан предприятиеләре өчен сыйфатлы туклануны оештыру – тотрыклылыкның һәм җитештерүчәнлекне үстерүнең мөһим факторы. Түгәрәк өстәлдә катнашучылар беләчәк:
Тармакның бурычлары һәм торышы турында: Татарстан Республикасы сәнәгать һәм сәүдә министрлыгы республика предприятиеләрендә туклануны оештыру системасын үстерү юнәлешен һәм анда “Хәләл” стандартының ролен билгеләячәк.
Дәүләт ярдәме турында: ТР Икътисад министрлыгы “Хәләл” стандартларына басым ясаучы җәмәгать туклануы предприятиеләренә һәм эшкәртүчеләргә нәтиҗәле ярдәм чаралары турында сөйләячәк.
Үсеш һәм яңа мөмкинлекләр турында: Татарстан Республикасы Авыл хуҗалыгы һәм азык-төлек министрлыгы “Хәләл” ризыкларның төп төрләре белән тәэмин ителеш дәрәҗәсе буенча мәгълүматлар бирәчәк, бу җирле авыл хуҗалыгы җитештерүчеләре һәм эшкәртүчеләр өчен мөмкинлекләр ачачак.
Әзер карарлар турында: җитештерүчеләр һәм туклану операторлары («ИТЛЕ КИТЧЕН» ҖЧҖ, «Бәхетле» ҖЧҖ кебек оешмалар) башка предприятиеләргә киңәергә әзер булган отышлы эш модельләрен тәкъдим итәчәк.
“Хәләл” стандартын кертү – туклануның гомуми сыйфатын күтәрү һәм күп конфессияле коллективларга хөрмәт күрсәтүнең нәтиҗәле юлы, бу үз чиратында корпоратив культурага һәм эш нәтиҗәләренә уңай йогынты ясый», – дип билгели оештыручылар.
Массакүләм мәгълүмат чараларына бу кай ягы белән кызык?
Әлеге чара икътисадтан һәм агросәнәгать комплексыннан алып социаль сәясәткә һәм милли тәңгәллек мәсьәләләренә кадәр темаларны колачлый. Түбәндәгеләрне белергә мөмкин булачак:
“Хәләл” индустриясен үстерү буенча төп министрлыкларның (сәнәгать, авыл хуҗалыгы, икътисад) карашын;
Азык-төлек стандартлары һәм ризык сыйфаты турында Татарстан мөселманнары Диния нәзарәтеннән эксперт фикере.
Татарстанның төрле шәһәрләреннән (Чаллы, Түбән Кама, Алабуга, Яшел үзән) уңышлы мисаллар.
Шул ук көнне “ИТЛЕ КИТЧЕН” җаваплылыгы чикләнгән җәмгыяте производствосында күчмә семинар узачак, анда технологик процессны үз күзең белән күрергә мөмкин булачак.
Ни өчен бу гади кулланучылар өчен мөһим?
Предприятиеләрдә “Хәләл” базарын үстерү республикада яшәүчеләрнең тормыш сыйфатына турыдан-туры йогынты ясый. Бу өч аспектта чагыла:
Сыйфат гарантиясе: заводларда һәм офисларда “Хәләл” туклану пунктлары челтәрен киңәйтү, ритейл һәм җәмәгать туклануы катнаш сегментларын да кертеп, халыкның киң катламнары өчен бу продукциядән файдалану мөмкинлеген арттырырга ярдәм итә.
Төбәк үсеше: җирле авыл хуҗалыгы продукциясен җитештерүне арттыру һәм аны хәләл стандартлары буенча эшкәртү Татарстанның азык-төлек иминлеген ныгыта һәм җирле җитештерүчеләргә булышу булып тора.
МАССАКҮЛӘМ МӘГЪЛҮМАТ ЧАРАЛАРЫ ӨЧЕН ТӨП МӘГЪЛҮМАТЛАР:
Үткәрелү көне һәм вакыты: 2025нче елның 3нче декабре, теркәлү сәг. 9.30-дан, башлану вакыты сәг. 10.00-дә.
Үткәрелү урыны: Казан шәһәре, Пушкин ур., 18, ТР Сәүдә-сәнәгать палатасы, конгресс-зал.
Катнашучылар: Татарстан Республикасы министрлыклары һәм ведомстволары, Татарстан Республикасы мөселманнары Диния нәзарәте, зур сәнәгать предприятиеләре, “Хәләл” продукциясен җитештерүче һәм таратучы оешмаларның җитәкчеләре һәм белгечләре.
Массакүләм мәгълүмат чараларын Rimma.Gatina@tatar.ru адресы буенча урнашкан электрон почта аша теркәлергә чакырабыз.
