Бүген, зөлкагъдә аеның 8нче көнендә (6нчы майда), Казанның “Мөхәммәдия” мәдрәсәсендә Бөек Ватан сугышында Җиңүнең 80 еллыгына багышланган тантаналы чара узды. Биредә мәдрәсәнең көндезге бүлегендә белем алучы барлык шәкертләр катнашты. Әлеге чарада Җиңү көнен якынайткан фронт һәм тыл геройлары искә алынды.
Мөселман яшьләре белән очрашу өчен мәдрәсәгә Бөек Ватан сугышы ветераны – Буа районыннан 98 яшьлек Котдус Мөлеков (1927нче елның 10нчы маенда туган) килде. Ветеран белән очрашу күңелгә үтеп керерлек һәм истә калырлык булды: ул мөгаллимнәрне һәм шәкертләрне сәламләп, “Фатиха” сүрәсен укыды, егетләргә һәм кызларга үзенең зирәк үгет-нәсыйхәтләрен җиткерде, Ватанга мәхәббәте турында сөйләде.
Ул шулай ук нацистларны җиңүдә дин тотучыларның роле турындагы истәлекләре белән уртаклашты. Котдус Мөлеков фронтта 1944-45нче елларда хезмәт итә, Латвия, Литва һәм Эстонияне азат итү өчен көрәшә, һәм сугыш тәмамланганнан соң тагын 5 ел хезмәт итә.
Сугыштан соңгы еллардагы авырлыкларга карамастан, Котдус бабай тормыш иптәше белән сигез бала тәрбияләп үстерә. Бүгенге көндә аның 44 оныгы һәм 87 оныкчыгы бар. Ул яшьләргә ныклы гаилә кору, балаларга һәм оныкларга тиешле тәрбия бирү хакында әһәмиятле үгет-нәсыйхәтләрен җиткерде. Ветеран билгеләп үткәнчә, ул дини тәрбия ярдәмендә нәсел дәвамчыларына мөһим тормыш кыйммәтләрен тапшыра алган.
Чара барышында Бөек Ватан сугышында Җиңүгә багышланган шигырьләр яңгырады, аларны шәкертләр сәнгатьле итеп сөйләде – бу шигырьләрдә Ватаныбыз өчен һәлак булган фронтовикларның, ветераннарның һәм солдатларның батырлыгы чагылыш таба.
Мәдрәсә җитәкчелеге Котдус Гариф улы Мөлековны Бөек Җиңүнең 80 еллыгы белән тәбрикләде. Очрашу ахырында Бөек Ватан сугышы елларында һәлак булганнарның рухларына багышлап дога кылынды.
