2 декабрь көнне Буа районы Килдураз авыл мәчетендә Мәүлид мәҗлесе булып узды. Кичәдә район имам-мөхтәсибе Илмир хәзрәт Хәсәнов, авылның мәчет имам-хатыйбы Кадим хәзрәт Мөбарәкшин, авыл советы җитәкчесе Әхәтов Зөлфәт, авылның ап-ак яулыклы ханымнары катнаштылар.
Мөхтәсиб Илмир хәзрәт мәҗлесне вәгазь-нәсыйхәт белән башлап җибәрде. Ул сөекле Пәйгамбәребез салләллаһу галәйһи вә сәлләмнең кешелек дөньясына әйтеп бетергесез зур йогынты ясаганы турында сөйләде. Авыл имамы Кадим хәзрәт бөтен авылдашларны Мәүлид ае белән тәбрик итте. Илмир хәзрәт, зур шәхесләрне мәчеткә һәрвакыт ярдәм иткәннәре өчен, мөхтәсибәт исеменнән рәхмәт хатлары белән бүләкләде. Мәүлид кичәсе хәзерләнгән мул табында дәвам итте.
